【 歎息橋 ── 不敢踐踏草地拾回自己皮鞋的苗嘉嘉 】
記得讀文化研究時，學會一個道理：觀影感受取決於自身經驗，意思是，不同人看待同一套影視作品都有不同解讀。2017年在戲院裏看韓國電影《逆權司機》或者在電視機前瘋狂追看《降魔的》，跟2020年再次收看上述兩套作品，同樣的情節、畫面、對白，從中領略得來的感受可以截然不同，所以很多觀眾只會覺得《城寨英雄》（2016）是一套武打劇集，但對我而言對白隱藏極為濃烈的抗爭意識，換句話講：明就明，唔明就點講都唔會明。
所以看《歎息橋》都一樣。啱啱遇着剛剛，早不看，遲不看，因為太忙，偏偏選擇在「5．21」這夜於巴士上用手機看第六集的下半部份，結果看到這一幕「草地物語」，震撼我心。劇情講到，身患絕症的鍾家俊（岑珈其飾）隨時沒命，但仍然堅持返校，不過他不會上堂，編劇沒有講明原因，是否學校因應其健康狀況酌情處理？抑或這是貴族學校，話之你操行得個E，總之家長有錢交學費就得？還是學校根本拿他沒法？第五集「失常」裏，訓導主任苗太（黃素歡飾）邀請鍾家俊母親梁淑媛（伍詠薇飾）到校會面，並且直接投訴鍾家俊這些差那些劣，結果「人都Catherine」的Catherine說：「冇可能，Kevin佢不嬲都好乖㗎喎！」
總之鍾家俊就是有「特權」，無需穿合規格的校褸回校，亦可以隨便走堂。如果說學校是一座控制學生思想發展的「囚牢」，鍾家俊就是籠中唯一一隻不會覺得翱翔天際是有病的鳥。他清醒、他敢言，那是編劇黃綺琳給他的「任務」── 擔任編劇代言人，點醒其他角色。說回這幕「草地物語」，他的同學苗嘉嘉（易健兒飾）性格懦弱，為了掩飾一個天大秘密，她要求自己從不犯錯，要做個乖學生，就算受盡欺凌也不敢出聲反抗，她認為那是命運的一部份，直至遇上鍾家俊，才明白甚麼原來她可以選擇過另一種人生。
鍾家俊打算到草地休息，見到嘉嘉站在小徑上乾急，於是問：「你喺度做咩呀？」嘉嘉說：「佢哋丟（她用發音刁）咗我隻鞋入去呀！」鍾家俊說：「咁你咪入去攞番囉！」嘉嘉說：「踩草地會記過㗎！」鍾家俊沒好氣的說：「黐綫，成間學校都傻㗎！」然後課堂的鐘聲響起，嘉嘉心急如焚：「啊～～～慘喇，要上堂喇，點算呀？唉，死喇！」鍾家俊一臉鄙視，逕自踏上草地，嘉嘉以為對方代自己拾鞋，連聲答謝：「唔該你呀，你好好人呀，但你要記大過喇，唔該晒！」
過了幾秒，才知道他沒此打算：「唔好意思呀，你可唔可以掉（刁）番隻鞋入嚟畀我呀？唔該呀～～Hello～～！」她再三央求，但鍾家俊懶得管，只說：「你自己入嚟攞咪得囉！」不過嘉嘉就是不敢越雷池半步：「打Lin鐘㗎喇，唔該你呀，快啲呀！」結果，嘉嘉只好在右腳沒鞋穿的情況下，跳回課室。看透世事的鍾家俊向觀眾總結：「成間學校，冇個正常！」誰人正常誰人失常，標準由誰決定？在學校裏，那條劃分草地與小徑的界綫，就是正常和失常的分野。
學校如城市如國家，掌權的人，擔心你整古做怪，就會立下規例，左禁右禁，要你聽話，要你服從，有些人擔心「犯規」會有代價，所以啞忍，但啞忍不代表在位者會尊敬禮讓，反而會更加嚴苛，帶來更多欺壓。負面新聞如連綿夜雨散落四周，香港人心灰絕望很正常，我無意叫大家不要氣餒，只想說，別要成為規條下的思想奴隸，未來日子，更要堅持做自己要做的事，說自己要說的話，就當我們都是鍾家俊，生命從來都有限期，別自欺欺人，佯作甚麼都沒有發生，他不孤獨，因為他遇上苗嘉嘉 ── 最多咪一齊被人記大過！共勉之。
P.S. ：易健兒演得很不錯，我幾乎認不出熒幕裏的就是她，香港實在有太多新晉演員沒機會發揮！
重溫第六集《歎息橋》：https://bit.ly/2WPbhb2
【 延伸閱讀 】
＊《歎息橋》伍詠薇趕走潘燦良一幕有出處？：https://bit.ly/2LF3R3Y
＊點解《歎息橋》叫愛情懸疑劇？https://bit.ly/2yxyDs9
＊第二集導讀 ─ 黃定謙太入戲「驚到喊」：https://bit.ly/35W9FiM
＊第四集導讀 ─ 若要人似我，除非兩個我：https://bit.ly/2T63R0N
＊第六集導讀 ─ 全劇最重要的角色鍾家俊：https://bit.ly/2X3giM6
＊第八集導讀 ─ 何樂兒終於知道自己是蠢材：
https://bit.ly/2Xj7gKW
（22052020）
＃游大東 ＃游大東影視筆記 易健兒 CreamyYick Norris Wong 黃綺琳 KaKi Sham 岑珈其 25 Fatballslim ＃歎息橋 金成 月巴氏 / Work Super Guy ＃黃素歡 ＃伍詠薇 Dumb Youth 做乜膠睇電視 快樂的 葉一知 gregory wong 王宗堯 ＃香港 山寨匠人：自自然然能夠生活
Search